Moi lu
Van t winter het Historiese Verainen n cursus holden op Ewsum: Grunneger Geschiedenis en Toal. Meesters: Kees Reinders en Fré Schreiber. Der deden zo’n 35 cursisten aan mit. Aan t èn van cursus onnaaierde Fré dat mensen nou zoveul leerd haren, dat ze konden wel n boukje moaken. n Boukje mit korde verhoalen en dij moggen overaal over goan. t Mooist zol t wezen as t over Middelsom ging. Elk was vot begaisterd! Veur 1 april mouten verhoalen ienleverd worden. En dat is gain kureghaid.
Dat ienlevern lopt vrij schier, mor der kin nog wel wat bie. Dou bedochten wie mit nkander dit: Elk het op t heden wat meer tied. Doarom mag elk mitdoun dij dat wil. nait bloots cursisten. Mor nou heuren wie joe aal stìnnen: ’Ik kin gain of mor naauw Grunnegs schrieven.’ Gain probleem. Dou t mor zo as ie t beste vienden, Fré kikt t wel noa en stuurt t joe weerom of t joe noar t zin is. Zel toch prachteg wezen as wie ien dizze tied mit nkander n schier boukje moaken kinnen. Zo van: ‘Dat hevve moakt dou wereld ien nood zat.’ Wie hebben t opsturen mit n moand verlengd. Dat wordt dus veur 1 maai. Dat mout din noar: Fré Schreiber: fcschreiber@hetnet.nl Nog ain ding: t Verhoal mag nait laanger wezen as 250 woorden. Mor meer verhoaltjes mag ook vanzulf.
Denk aan herinnerns van vrouger, wat je mitmoakt hebben dat iendruk moakt het. En pebaaier doarmit n lien noar dis tied te trekken, as t kin. Dus Middelsommers, Hoezeners, Wietwerders, Doorders en aal: der maank!
Veul sukses. Je heuren der van as t boukje der is.
Bron & foto: Historische Vereniging Middelstum (25 maart 2020)